Heile Jotunheimen nasjonalpark er prega av høge fjell og brear, og her finn du dei høgste fjella i Norge. Dei tre høgste toppane er Galdhøpiggen (2469 moh), Glittertind (ca. 2465 moh) og Store Skagastølstind (2405 moh).

Nesten halvparten av Jostedalsbreen Nasjonalpark er dekka av den største isbreen på det europeiske fastlandet - Jostedalsbreen.

Dette landskapsvernområdet ligg i tilknyting til Jotunheimen Nasjonalpark, og vart oppretta samstundes med nasjonalparken i 1980. Området ligg i kommunane Årdal og Luster, og omfattar både Utladalen og tilliggjande sidedalar med vakre fossar og fleire verdifulle bygningsmiljø. Her finn du Vettisfossen, som er det høgste verna fossefallet i Norge.

Nærøyfjorden landskapsvernområde vart oppretta i 2002, og omfattar i hovudsak den verdskjende Nærøyfjorden og fjella kring den. Området er prega av eit dramatisk fjordlandskap med ei rekkje fornminne og særmerkte bygningsmiljø.

Stølsheimen landskapsvernområde er karakterisert av mange stølar i eit kupert fjellandskap som grensar ned mot eit dramatisk fjordlandskap. Innanfor verneområdet ligg den veglause og eksotiske Finnafjorden i Vik kommune.

Små og tilnærma urørte område med naturtypar eller dyresamfunn som har høg naturfagleg og vitskapleg verdi, vert verna som natturreservat. Dette er den strengaste forma for områdevern. I Sognefjordområdet finst det fleire naturreservat, som t.d. fuglefredingsområdet Hafslovatnet (Luster) og våtmarksreservata Bøyaøyra (Sogndal), Vetlefjordsøyra (Balestrand) og Grånåsmyrane (Aurland). Barskogreservatet Skogateigen i Luster vart oppretta i 1914, og er det eldste naturreservatet i Norge. Det kanskje mest kjende naturreservatet i dette området er Nigardsbreen (Luster), som i tillegg er ein del av Jostedalsbreen Nasjonalpark.